Nær 5 milliardar til det statlege barnevernet

Dei totale utgiftene til det statlege barnevernet utgjorde 4 934 millionar kroner i 2008. Dette tilsvarer ein vekst på drygt 8 prosent frå året før. Fordelinga av utgifter etter type barnevernsteneste viser at utgiftsveksten framfor alt kjem av ein auke i talet på fosterheimar. Dei to andre barnevernstenestene, barnevernsinstitusjonar og hjelpetiltak i heimen, auka meir moderat, med høvesvis 5 og 6 prosent det siste året. Utgifter til barnevernsinstitusjonar stod for 64 prosent av dei totale utgiftene til det statlege barnevernet.

Aktivitetstala viser same tendens som indikatorane for bruk av ressursar. Også her er det størst vekst i fosterheimar. Talet på opphaldsdagar i fosterheimar auka til dømes med 8 prosent det siste året. Dei siste fire åra har talet på opphaldsdagar i fosterheimar vakse med 83 prosent.